tima he "submarines" me ki pea he "tohora" he rite tonu hoki te haere ki ta te tohora ara ka ruku i etahi wa, ka puea ake ano. He tima wetiweti rawa enei, a he tima ririki noa tino papaku rawa atu hoki. Ko a ratou tino kawenga he topito, kia tata atu ki te tima o te hoariri ka tukuna atu ana topito. Pa atu ana aua topito ki te tima paku ana ma reira tonu e tukituki te tima I peneitia e te Tiamani enei tima e toru o te Ingarihi a e toru aua tima pakaru katoa totohu atu hoki. E 755 nga tangata ki runga i te mea kotahi o enei tima no reira katoa nga tangata o runga i a ratou e 2265 O tenei 2265 heremana e 700 ano i ora. He hanga aroha tenei mate o te Ingarihi i te mea he mea patu ngaro na te Tiamana.

E 6,000,000 nga hoia a Ruhia kua noho takatu inaianei mo te haere ki te whawhai. Ko ana tangata kei te whawhai inaianei 1,000,000 e 500,000 kei te whawhai ki a Tiamani, e 500,000 kei te whawhai ki Ahitiria. Tetahi rongo kua tae mai ko te matenga o Ahitiria i a Ruhia raua ko Hewia e kiia ana nuku atu i te miriona nga hoia a Ahitiria kua matemate kua riro herehere ranei i enei mana ara te tikanga he nuku atu i te hawhe o te kaute katoa o nga hoia o Ahitiria. Ka pari te ihu o Ahitiria.

TE OPE HOIA MAORI.

KUA whakaaetia e te Kawanatanga o te Tominiana kia haere nga Maori ki te whawhai. Katahi ano ka tutuki te wawata a te Maori kia tu tahi raua ko tona tuakana pakeha i roto i nga pakanga e pa mai ana ki te Emepaea o Ingarani. He tino honore nui tenei ki a taua ki te Maori ta te mea kei te pakanga tino nui whakaharahara rawa ki te ao ka whakaaetia taua kia uru atu ki nga mametanga o te Emepaea. Ko te kaute o nga hoia Maori hei haere e 500. Ko taua rima rau ka tangotangohia mai i roto i nga iwi nunui katoa o Aoteroa me te Waipounamu. Kua tae mai nga waea a Ta Timi Kara raua ko te Hon. A. T. Ngata whakaatu mai ka tae mai raua ki Turanga nei a te 3 o nga ra o Oketopa nei kia kite i te hunga e kowhiritia rno te haere o te Tai-rawhiti katoa nei mai i nga rohe o Ngatiporou ki a Ngatikahungunu ki te Wairoa. Kaore ano kia tino marama te wahi nga wahi ranei hei tukunga i nga hoia Maori. Ko te rongo ko etahi ka tukuna hei tiaki mo Hamoa ko etahi ka tukuna ki Ihipa rano. Haere e tama ma, haere. Haere kia tama tane kia toa. He iwi toa taua te Maori i nga ra i o tatou tupuna; no reira ka haere na koutou kia toto nga ngakau hei nga ngakau o tatou tupuna.

Haere me te whakaaro ki te pupuri i te rongo toa o tatou tupuna kaua hei tukuna e koutou kia ukuia atu i runga i a tatou i a ratou uri i tenei ra. Haere, "Kia wehi ki te Atua, whakahonoretia te Kingi."

Ma te Atua koutou e manaaki e tiaki i a koutou ka haere na Mana koutou e arataki i roto i nga kino katoa e tupono mai ki o koutou aroaro, a ki te pai ia Mana ano koutou e whakahoki pai mai ki Aotearoa te whenua o to koutou whanautanga.

PIHOPATANGA O WAlAPU.

TE HAHI MAORI.

HE tikanga ena i whakaritea e te Komiti o te Hinota  mo te taha Maori o te Hahi: 

1. Me tukutuku te oranga mo te Minita Maori, i ia marama, i ia marama. He mea nui tenei, engari e kore e taea ki te kore e tukua ki Nepia e nga Pariha Maori he oranga mo te Minita. Ma te tuku wawe i taua oranga e tae wawe ai te oranga ki te Minita.

2. Kia tangohia i te oranga o ia Minita o ia Minita e £ 2-0-0 i te tau mo te Poari Penehana. Ko taua £ 2-0-0 te mea e riro mai ai te Penehana mo te Minita ina kaumatua ia, ki te mea ranei e pangia ia e te mate.

3. Ko te oranga mo nga Minita o Heretaunga, o Rotorua hoki, ma te Hahi Maori anake e whakarite, ara ma te Tahua Oranga Minita, tetahi wahi, ma te iwi o te Pariha tetahi wahi. Kahore

e tino rite te hua o te Tahua Oranga Minita ki te oranga mo nga Minita: e £ 90-0-0 e hapa ana i to Heretaunga,'e £ 40-0-0 i to Rotorua.

4. Kia pera ano te tikanga mo nga Pariha o Turanga, o Whangara, o Tokomaru, o Hikurangi, o Waiapu, o Te Kawakawa, o Te Kaha: ara ma te Tahua oranga Minita, ma te iwi o te Pariha e whakarite. Ko te moni e hapa ana mo ena pariha e whitu ka tata ki te £400.

5. Kia ata inihuatia nga Whare-karakia katoa me nga whareminita.

6. Kia whakapangia ki nga Pariha Maori tetahi wahi o te utu mo te Hinota Pihopatanga i ia tau, i ia tau, kia kaua e waiho ma te taha Pakeha anake taua pikaunga.

7. Kia whakamaharatia nga Pariha Maori ki nga kohikohi i whakahaua e te Hinota ara:

- Mo te Hahi Maori, a te Ratapu tuatahi o te Haerengamai.
- Mo nga wahi rawakore o te Pihopatanga, a te Ratapu tuawha o Reneti, a te Ratapu tuatahi hoki i Hepetema.
- Mo Meranihia, a te Ra Petekoha.